Ardi Grisa

Zaharrak berri

2009-12-13T10:54:00.004+01:00

Joan zaigu euskararen eguna eta lehen bezain zaila egiten zait kaletik euskara entzutea.

Joan zaigu Durangoko 44. azoka eta metroan Stieg Larsson-ek liburuak baino ez ditut ikusten.

Krisia? Bai, edonon entzuten dugu krisi hitza. Jakin badakigu gure hizkuntzak izan dituen eta gaur egun dituen zailtasunak (esaterako aurten Lehen Hezkuntzan gaztelania ordu bat gehiago izatea derrigortu dute...). Baina estatistikek krisia ez, eta euskararen hiztun kopuruaren gorakada agerrarazten dute.

Egia da, gero eta guraso gehiago hautatzen dute D eredua haien seme-alabentzat. Zertarako? Haiei galdetu beharko...

Azken boladan Eusko Jaurlaritzak izan duen ideia borobilena izan da bono-kultura. Bihar, abenduak 14 hasten da bonua lortzeko epea. Has gaitezen euskal kultura kontsumitzen eta erabiltzen!!!!

Gaur bitartean konforma gaitezen bertsolaritza final handiarekin. Sarrera lortu ezin izan dugunontzat, piztu Etb-ko lehen katea. Finala hastear da eta!

Konturatu gabe

2009-11-30T23:47:00.002+01:00

Horrela joaten dira bizitzako segundu, minutu, ordu, egun...

Eta horrela joan zaizkit niri azaroa eta urria. Nahigabe izan nuen bilblogari honen berri eta gustura idatzi ditut burutik pasa zaizkidan burutapenetariko batzuk.

Orain bi hilabete beltz ikusten nuena, zuri kolorekoa ikusten dut orain. Eta zorionak irribarre handiagoa margotu du nire aurpegian. Eta irribarre horrekin esnatzen naiz egunero!

Hau ez da taldeko blog-a, ezta blog tematikoa ere. Nire burmuineko ezker aldean aurkitzen omen den kreatibitatea ez dut oraindik topatu. Eta horrek blog originalena izatea galarazi dit.

Baina inork ez dit oztopo gehiago jarriko nire zoriontasunaren bidean. Eta inork ezingo dit debekatu blog honen bitartez, nire barruan ditudanak botatzen.

Beraz, hemendik pasa zareten horiei, mila esker. Nire berri gehiago izango dituzue, zin dagizuet.

ESKERRIK ASKO!

Ametsak amets

2009-11-27T23:08:00.003+01:00

Gaur hamaikagarren aldiz, email bat jaso dut. Gaur hamaikagarren aldiz, email horrek zeukan esteka ireki dut. Eta gaur hamabigarren aldiz, bertan zetorrenak hunkitu egin nau.

Betidanik izan dudan ametsa, maratoi bat korritzea izan da. Txikitan hasi nintzen atletismoa praktikatzen eta orain 23 urte ditudanean, gero eta hurbilago ikusten dut ametsa lortzea. Lehenago ere egin nezakeen, baina ez dut pot eginda helmuga zapaldu nahi. Azkenengo kilometroak disfrutatu nahi ditut eta horrek nire ametsa atzeratu egiten du.

Badakit zein zaila den maratoi bat prestatzea eta horretarako behar den denboraz ere zertxobait komentatu didate.

Maratoiaren ostean, noizbait burdinezko gizon bilakatu nahiko nuke. Eta posible bada Hawaii irletan, baina hori ametsa baino gehiago utopia litzateke...

Momentuz, email honek barrenean sortarazten didanarekin disfrutatzen jarraituko dut!

Ta domekan, kantak dioen moduan, Santurtzitik Bilbora!

Emakumeenganako indarkeriari EZ

2009-11-25T22:20:00.004+01:00

Bai, gaur 25 ditu azaroak. Emakumeenganako indarkeriaren aurkako eguna dugu.

Hedabideek azken urte hauetan azaleratu duten gaia dirudien arren, emakumeek aspalditik pairatu duten gaitza da. Gizartea betidanik izan da androzentrista, beti gizona izan da gure munduko erdigunea.

Baina gauzak aldatu egin dira, derrigorrez aldatu ere. Lehen gizonenak baino ez ziren esparru asko, gaur egun gizon zein emakumeenak dira. XXI. mendean bizi garen honetan, ez diogu hainbeste generoari begiratu behar. Ni mutila baino pertsona naiz, eta nire moduan pentsatzen dute gaurko mutil askok ere.

Indarkeriak ezin du hezkuntza-sistema soilik ezabatu. Gizartearen laguntza ezinbestekoa izan beharko du. Tratu txarrak jasotzen dituen emakume baten semeak, urteren buruan berdina egingo du kontrakoa erakusten ez baldin badiogu. Pertsonak hezi egin behar dira, baina ez eskoletan bakarrik. Eskolatik kanpo ordu asko ematen dituzte gaurko umeek, eta jasotzen duten informazioa behar beste baino gehitxoago dela deritzot.

Bilboko Udaletxeak nerabezaroei zuzendutako, baina helduagoentzat baliagarri den webgune berri bat zabaldu du azken aste honetan:

GEU BIOK

Honekin batera, iaz Eudelek egindako bideo bat uzten dizuet.

Datorren urtean, tratu txarrengatik emakume bat bera ere hil ez danik ospatu gura nuke.

Denon artean lortuko dugu!

Ustekabeko oparia

2009-11-20T20:16:00.001+01:00

Nik gabon hauetan baietz esango diot kulturari, kultura oparitu egingo dut.

Gero eta goizago hasten dira gabonak gaurko gizartean. Hara hor kaleetako argi distiratsuak, buzoiko propaganda mardulak, telebistan etengabe botatzen dituzten jostailu iragarkiak...

Baina aurten Eusko Jaurlaritzak berri on batekin aurreratu dizkigu gabonak! Kultura bonua hain zuzen ere!

25 euro ordaindu eta 40 euroko bonua jaso bueltan. Negozio txarra ez ezta? Denda guztietan eskaintza hauek jarriko balituzte, krisi garaia bada ere, erosketa gehiago egingo genituzke duda barik.

Baina eskaintza guztiek letra txikia dute eta hau ez zen salbuespena izango:

Zenbat bonu erosi ditzaket? Bat!

Denda desberdinetan erosteko aukera? Ez!

Informazio gehiago nahi izanez gero --> Kultura bonua

Gogoratu abenduaren 14an jarriko direla salgai! Adi egon!

Gaurko gizartea

2009-11-17T14:45:00.001+01:00

Gizakiaren definiziorik borobilenetako bat ikusteko aukera izan nuen atzo.

Ikusi? Bai, ikusi eta entzun egin nuen (ingelesez). Irudi bitartez hurrengoa azaltzen digu: tximinoak baino ez gara.

Bizi osoa ematen dugu animaliengandik desberdintzen gaituzten ezaugarriak zerrendatzen, baina gauza positiboei baino ez diegu so egiten. Baina ez gara konturatzen, gure pentsaera, kolore, erlijio... desberdinekoak gorrotatu egiten ditugula.

Eta hori gutxi balitz, bizi garen planeta hau gurea eta guretzat eginikoa dela uste dugu. Bideoak arrazoi du, tximino hutsak gara.

Hiyab

2009-11-12T22:22:00.002+01:00

Azken urteotan asko hitz egin da hiyab hauen inguruan: bai, emakume islamiar askok erabiltzen duten zapi antzekoa.

Irakasleei zuzendutako hezkidetza ikastaro batean, eztabaida sor dezakeen bideo bat ikusteko aukera izan genuen. Eztabaida sortu ez, eta kontrakoa lortu zuen. Hitzik gabe geratu ginen.

Askotan, irakasleok aldarrikatzen dugu berdintasuna hezkidetza bezalako hitz potoloekin. Baina gure zilborrari so egin beharrean, besteen desberdintasunaz baliatu beharko ginateke.

Atzerritar baten desberdintasunak gure kultura aberastu beharko du derrigorrez. Eta arazo ez denak, ez dezagun arazo bihurtu mesedez!

Behobia - San Sebastian

2009-11-08T22:07:00.001+01:00

Urtero legez, azaroko bigarren igandearen zain geunden, azkenean heldu da.

Ez dira asko izango igande batean goizeko zazpiretan altxatzen direnak. Are gutxiago euria goitik behera badago. Baina badira hori bakarrik ez eta Behobiara eramango dituen autobusa hartzeko altxatzen direnak.

Aurtengoa bosgarren urtea errenkadan izan dut, eta gero eta gogo gehiagorekin hartzen dut. Aspaldi utzi nion neure burua presionatzeari eta erlojuko denborak ez nau batere larritzen. Disfrutatzea da nire helburu nagusia eta hori lortzeak asetzen nau.

Bi portu, bata mendikoa eta bestea itsasokoa, aldapa beldurgarria eta txirristak nonahi. Baina beste lasterketa batzuek inoiz lortuko ez duten izaera gordetzen du Behobiak. Berdin dio, Irun, Pasaia, Lezo edo Donostian egotea, berdin dio euria ala eguzkia den, zaleak bertan izango dira.

Hurrengo urtean disfrutatzeko asmoa baldin baduzue: http://www.behobia-sansebastian.com/ Maiatza inguruan izaten dira inskripzioak...

Ez naiz oraindik hasi seigarrena prestatzen, baina ziur nago aurrekoak beste disfrutatuko dudala.

Malko gorriak 24 orduz

2009-10-28T22:56:00.001+01:00

Heriotza ulertu eta bizitza disfrutatu.

Horixe da orain egun pare batzuk irakurri nuen esaldia. Egia da, egun batetik bestera dena alda daiteke, apurtu edo jauzi.

Baina horrek aurrera jarraitzeko grina eman behar digu, segundu bakoitza disfrutatzeko nahia. Eta horrela izango delakoan, agurtu egiten naiz. Gaur ez dago gehiago esaterik.

Bizitzaren motorea

2009-10-25T18:18:00.005+01:00

Egunak argitzen duenerako nire bihotzak zure izpiak ditu nabari eta gauaren iluntasunak giltzatu egiten ditu nire ezpainak. Egunez eta gauez zaitut behar, zu baitzara nire taupaden erritmoa.

Zure tristurak goibel jartzen nauen moduan, zure alaitasunak irribarrea eragiten dit. Poztasun horrekin nabil aspaldi eta noizbait amestutako zoriontasuna eskuekin ukitu dezaket.

Garraiorik azkarrenaren abiaduran ikusi zintudan lehenengoz eta barraskilorik geldoenaren pare ezagutu ditut hainbeste gustatu zaizkidan guztiak.

Askotan galdetu diot neure buruari nolakoa ote zen nire aurreko bizitza, eta ez diot erantzunik topatu edo agian ez dago bidezko erantzunik…

Baina non ezkutatzen da maitasuna? Ez da aurkitzen bihotzean, ez da topatzen buruan; gorrotik ez dagoen lekuan baino ezin ditu bere haziak erein.

Aurreko hitzek gauza asko eta gutxi esaten dituzte. Asko sentimendu hau ezagutzen ez dutenentzat eta agian gutxi, sentimendu goren horrekin topo egin dugunontzat.

Bada munduan milioika hitzek deskriba ezin dezaketen sentimendu bat, maitasuna.

Era berean, ez da munduan zure presentzia bezalakorik.

Mila esker maitasunaren geltokira eraman izanagatik!

Gaztetasuna

2009-10-21T21:43:00.004+02:00

Lehen aski argi zegoen, gaztetasuna noizbait bukatu egiten zen. Gaur egun ordea, biziaren etapa hau luzatu egiten da nonbait. Agian, gazteek gurasoen etxean pasatzen ditugun aldia luzatzen den moduan luzatzen da gaztetasuna.

Gutxi dira gaur egun 30 urtetik behera etxeko babesa utzi eta independiente bilakatzen direnak. Are gutxiago, 25 urte inguruan joaten direnak; lehen, nahiko arrunta bazen ere.

Orain dela hilabete pare batzuk, gazte txartelak luzatu egin zuen bere txarlelaren iraupena: 29 urtera arte. Bilbao Bizkaia Kutxak aspaldi atera zuen BBK 26+ txartela. Kolorea? Beltza. Gaur egun adin-tarte horretako gazteek duten etorkizunaren seinale.

Iragan astean aldizkari batean irakurri nuenez, 2009ko lehenengo seihilabetean etxebideko zerrendetan izena eman dutenen kopuruak errekorra markatu du. Gure gazteen ilusioak gordetzen ditu zerrenda horrek. Izena eman nahi baduzue: http://www.etxebide.info/

Ni oraingoz euromilloian gastatzen ditut ostiralero 2 euro. Etxebideko zerrendetan izena ematea baino garestiagoa da, tokatzen zailagoa, baina ilusioak ilusio dira. Egun hauetako batean...

Maite, maite...

2009-10-15T23:32:00.010+02:00

...esanahia zuen keinu bat eginez agurtzen zituzten arrantzaleek Ondarroako portuan beraien zain geratzen ziren emazte eta seme-alabei.

Zorionak Kirmen Narratiba Sari horrengatik!

Phillis Levin-ek New York-en definitu zuen modu eder batean:
"Altxorraren mapa ematen du zuen hizkuntzak", erabiltzen ditugun 'ixa' guztiei so.

Hori da euskara: altxorra, egunero gure eskura dugun altxorra. Bilbao- NY - Bilbao liburua irakurtzea ahalbidetzen digun altxorra.

Ez dut inor engainatu nahi, ez naiz inor engainatzen saiatuko. Kirmenen liburua 2008 urteko gabon oparia izan nuen, baina nire liburu zaletasun eza dela eta, altxor hori gordeta izan dut. Atzo jakin izan genuen albistearen ondorioz argia ikusi du liburuak.

Baina ez da hori arrazoi bakarra izan, astero hainbat ordu ematen ditut metroan; denbora nolabait aprobetxatu behar. Eta gaurkoa ondo aprobetxatu dut: joan eta etorri, 50 orri. Bai, datorren asteko bidaietan bukatzeko asmo irmoa.

Istorioek harrapatu egin naute, eta Bilboko Arte Ederren museora bisita egin beharko ote dudan galdetzen diot neure buruari. Gaur zortzi jakingo duzu nire asmoek non bukatu duten.

Besterik gabe, gabon!

P.d. Gehiago irakurri nahi baldin baduzue... Berria.info

13:13

2009-10-13T13:13:00.001+02:00

Gauza asko esan daitezke zenbaki honen inguruan, horietariko askok sineskeriarekin lotutakoak. Angel Nietok 12+1 mundial irabazi zituen, eraikin askotako hamairugarren solairuari hamalau zenbakia jarri diote, hegazkinetako hamairua 12 bis bilakatzen dute...

Anglosaxoniar herrialdeetan ostirala eta 13 zorte txarreko eguna omen da. Hemen ordea, asteartea dugu. Eta gaur...asteartea eta 13 da. Gera gaitezen etxean!!!

Ez dut sineskeria kontuetan sinesten. Eta 13 zenbakia inoiz ez badut gorrotatu ere, aspaldi hartu nuen begiko. Arrazoiak? Hainbat.

Baina utzi dezagun zenbaki primo hori eta hartu dezagun beste bat. Hamaika: horiek baitira nik ditudan maniak.

Ez pentsa zu baino arraroagoa naizenik edota blog honen edukiera agortzeko beste ditudala, baina bai dezente. Nork ez du zebrabide bat marratxo zuriak baino ez zapalduz igaro? Nork ez du ohe azpian begiratu oheratu aurretik?

Umetan denok eginiko gauzak dirudite edo agian hain umetan ez eginikoak... Etxeko atea itxi, igogailua hartuta kalera irten eta noizbait itzuli al zarete atzera bueltan? Barregarria? Behin gertatuta ulergarria, ohitura hartuz gero...

Erlojua begiratu eta 13 ordu 19 minutu eta segundu batzuk markatzen du, baina 7 minutu aurreratuta dago. Ez dago galdera egiteko betarik. Gauza asko horrela dira eta kitto.

Idazki hau 13 zenbakiarekin hasi dut eta blog-eko ordulariaren laguntzaz horrela bukatu nahiko nuke. 13 zenbaki berezia da, arras berezia.

Segundu bat, mila sentimendu

2009-10-11T19:07:00.004+02:00

Segundu bat mila aldiz zatitzea posiblea da, baina ezinezkoa segundu horretan senti daitezkeen sentimenduen multzoa deskribatzea.

Nire sentimenduak kanpora ateratzea izan da nerabezaro garaitik gainditzeke geratzen zitzaidan irakasgai horietako bat. Zergatia ezagutzeko ez dut urrutira jo beharrik: nire izateko era. Gauza gutxik emozionatzen ninduten eta gutxiagok negar. Non geratu ote ziren isuri ez nituen malko haiek?

Galdu egin ziren. Noizbait galdu, nonbaiten galdu. Azken urteetan biziak inoiz berreskuratuko ez dudan malko horien garrantzia erakutsi dit. Maite dudan norbaiten faltagatik egin dut negar, ingurukoak edo ni txarto sentitzean egin dut negar eta zoriontasuna nirekin batera bidaiatzean egin dut negar.

Malko bakoitzak sentimendu asko gordetzen ditu bere baitan, zein baino zein sakonago. Baina malkoen hizkuntza ulertzea zaila suertatzen da askotan. Bihotzaren zirrikitu ñimiñoenenak gordetzen duen altxorraren balioaz jabetzeko, erabil ditzagun ahalik eta tresna gehien. Malko batek asko esaten badu ere, hitzek esanahia borobildu dezakete.

Eta urteek azala sikatu egingo didate. Eta urteek giharrak ahuldu egingo dizkidate. Eta urteek bihotza makaldu egingo didate. Halere, inork ez dizkit lapurtuko zoriontasunarekin isuritako malko haiek.

Sentimendu eder horiek itsatsita zeramaten malko gehiago zoriontasunarekin batera isuri ez izanaz damutzen naiz.

Maitasuna

2009-10-05T01:27:00.001+02:00

Aspaldi konturatu banintzen ere, nire ahoak inoiz ez du tutik esan eta nire hatzamarrei esker orain izango duzu nire burutapen sakonenak ezagutzeko parada. Entzun! Behin bakarrik errepikatuko baititut.

Maitasunak mundua mugitzen du. Maitasunik ez duenak ez da bizi, munduan dago. Egia absolutuak, aintzinako filosofoak ikasi nitueneko garaia dakarkit burura. Ni ez naiz aintzinakoa eta hauxe da nire egia absolutua: maitatu bizi ahal izateko.

Maitasuna ezagutu baino gehiago, gorputzeko poro guztiekin ukitu dut, nire barreneko organo guztiekin sentitu dut; nire birikiek maitasuna arnastu dute eta nire odola ez da bihotzeko taupadei esker mugitu, maitasunari esker baizik.

Ken Zazpi taldeak "Bihar" izeneko abestia idatzi zuen. "Ez esan maite zaitut, ezin bazaitut euki.... Hondarretatik hasi beharko naiz berriz... Erlojuaren orratzak orain geldiarazi...". Nik ez ditut erlojuaren orratzak geldiarazteko gura, zure alboan denborak aurrera nola egiten duen ikusi nahi dut. Nik ez dut hondarretatik hasi nahi zure eskuek laguntzen ez banaute. Eta maite zaitut entzuten dudan bakoitzean, musu bat izan dezagula maitasun horren lekuko.

Bai, arrazoia duzu. Asko edo agian zailegia nik eskatzen dudana. Askotan entzun dugu esperantza dela galtzen den azkeneko gauza. Ez, ez dut galduko. Baina esperantza galtzen ez dudan era berean, zin dagizut maitasuna ere ez dudala galduko.

Orain irakurri duzun hori, ez dira teklatu bati esker idatzitako hitzak. Horiek nire sentipenak letra bilakatu ostean hartu duten formak dira. Ez ditut adjektibo batekin definituko, nire ustez adjektibo askorekin definitzeko aukera badut ere. Ederregiak? Agian bai, baina ez ahaztu maitia nire sentipenak direla.

Aurkezpena?

2009-10-04T16:33:00.001+02:00

Horrelakoetan, bi musu eman ohi dira. Baina hau ez da aurkezpen horietako bat; nirekin duzun lehen kontaktua Internet bidez izan berri da. Ez dakit berriro elkar ikusteko aukera izango dugun, baina badaezpada nire helbidea zure historialean kopiatu dut orain dela segundu bakan batzuk.

Ez ezazue pentsa pertsona mesfidatia naizenik, ezta gutxiago ere. Baina oraintxe ezagutu zaitut eta zure aurpegia ez ikusteak ez dio nire konfiantzari hazten uzten: horrelakoa naiz ni. Internet-ek eskaintzen dizkigun baliabideak asko dira eta anitzak bertan egin daitezkeen gauzak. Baina beti daude arriskuak. Arraroa badirudi ere, pantaila ziztrin bati idazteak arriskua du!

Aurrekoa esan eta gero, zazpi begirekin ibiliko gara...

Oraindik ez zaretela aspertu? Beno, normala da aurpegi bako baten mobidak pantaila aurrean irakurtzean, beste edozertan murgiltzeko nahiak izatea. Baina horrela ez bada, mila esker. Nire berri gehiago izango dituzuelakoan, agur bero bat.